मोरङको मिक्लाजुङ गाउँपालिका–३ टाँडीस्थित धोबेनीमा रहेको चुरेफेदी महिला बचत तथा ऋण सहकारी संस्थाको ३४ लाख रूपैयाँ चोरी भएको छ । मूल ढोकाको ताला फुटाएर सहकारीको रकम चोरी गरेको पाइएको प्रहरीले जनाएको छ । घटना शुक्रबार रातिको हो । तर, प्रहरीले भने शनिबार दिउँसो साढे १ बजेतिर मात्रै जानकारी पाएको थियो । घटना शंकास्पद देखिएपछि प्रहरीले १ जना कर्मचारीलाई नियन्त्रणमा लिएर अनुसन्धान सुरु गरेको छ ।
प्रहरीले सहकारीको आर्थिक कारोबार हेर्ने कर्मचारी मेनुका नेपाली (शिवा)लाई नियन्त्रणमा लिएको हो । घटनामा उनको संलग्नता यकिन भइनसकेको प्रहरीले जनाएको छ । प्रहरीले सहकारीकी अध्यक्ष मीना कार्की, प्रबन्धक प्रकाश खनालसहित अन्य पदाधिकारी र कर्मचारीमाथि पनि सोधपुछ गर्ने काम भइरहेको जानकारी दिएको छ ।

प्रारम्भिक अनुसन्धानबाट घटना हुनुअघि सहकारीकी कर्मचारी नेपालीले बुझाउनुपर्ने हिसाबकिताब प्रबन्धक खनाललाई नबुझाएको खुलेको छ । सहकारीको ताला फुटाएर कार्यालयभित्र पैसा राखिएको ‘सेभ’ तोडेर चोरी गरेको पाइएको मोरङ प्रहरीका प्रवक्ता डीएसपी दीपक श्रेष्ठले जानकारी दिए । उनका अनुसार तोडफोड गर्दै पैसा निकालेको अवस्थामा कार्यालयबाट करिब ५० मिटर पश्चिममा ‘सेभ’ फेला परेको थियो ।

‘रातको समयमा मूल ढोकाको ताला फोडेर सहकारीभित्र छिरेको देखिन्छ । कार्यालयका कुर्सीहरु टेबुलमाथि राखिएको अवस्थामा भेटिए,’ उनले भने, ‘कार्यालयबाट बाहिर निकालेर तोडफोड गर्दै पैसा निकालेको अवस्थामा ५० मिटरजति पश्चिममा ‘सेभ’ फेला परेको छ । थप अनुसन्धान गर्ने काम भइरहेको छ ।’ सहकारीमा चोरी भएको कुरा सुरुमा प्रबन्धक खनालले प्रहरीलाई जानकारी गराएका हुन् ।

खनालले सहकारीको ३४ लाख चोरी भएको जानकारी गराएको प्रहरीले जनाएको छ । तर, चोरी भएको रकम यकिन हुन बाँकी रहेको डीएसपी श्रेष्ठ बताउँछन् । पैसा कसरी राखिएको थियो, सहकारी कसको जिम्मामा थियो र घटना कसरी भयोभन्ने बारेमा विस्तृतमा अनुसन्धान भइरहेको उनले बताए ।
अनुसन्धान सकिएपछि मात्रै यस विषयमा थप प्रष्ट हुने डीएसपी श्रेष्ठको भनाइ छ । उक्त सहकारी स्थानीय महिलाहरु मिलेर २०६८ सालदेखि सञ्चालनमा ल्याएका हुन् ।

• 
• 
• 
• • • धेरै कमेन्ट गरिएका
  • मिक्लाजुङमा साहित्यक जमघट
  • एमाले कोशी प्रदेशको अध्यक्षमा घनश्याम खतिवडा विजयी
  • मिक्लाजुङमा वार्षिक योजना तर्जुमाका लागि सुझाब संकलन
  • बृहत निःशुल्क स्वास्थ्य शिवीर सम्पन्न
  • उपाध्यक्ष संग जेष्ठ नागरीक स्वास्थ्य कार्यक्रम सम्पन्न
  • कोशीमा १५ बर्षिय बालिका बेपत्ता , खोजि कार्य हुँदै
  • कोशी अस्पतालको शौचालयमा नवजात शिशु मृत फेला
  • राष्ट्रिय बाणिज्य बैंककाे ५९ ‌‍औं वार्षिकाेत्सव
  • पथरीमा भीम पौडेलको दादागिरी : शौचालयको मलमुत्र जनताको न...